आक्रोश
धरणीवर कोसळतो केवळ
आक्रोश या नभाचा !
आणि कडाडून जाते वीज
अंतरंग तिचे वाचा !
वृक्ष कापले, फुले तोडली
दूर्वाही खुडलेल्या !
उंच उंच प्रासादांखाली
व्यथा किती बुडालेल्या !
झाकोळून टाकती नभाला
उष्ण धुरांचे लॉट !
उमलून येण्याआधी कळ्यांचे
कुणी कापले ओठ?
कर्णफॅटत्या कर्कश ध्वनीचा
जिथेतिथे उच्छाद !
किरकिरती ना रातकिडे
पक्ष्यांचे विरले नाद !
थांबशील का? मर्त्य मानवा
खेचून स्वार्थलगाम !
पहा एकदा धरणीचे
कंठात अडकले प्राण !
अडली धरती आर्त पुकारी
नभालयीच्या मेघा !
झडली पाने, खुडले अंकुर
कितीक पडल्या भेगा !
मेघांच्या आतून कडाडे,
संतापून मग वीज !
सागरासही लाजवते
ती आकाशाची गाज !
धरणीवर कोसळतो तेव्हा
आक्रोश या नभाचा !
आणि कडाडून जाते वीज
अंतरंग तिचे वाचा !