संध्या
स्वरांतिक संध्या, निळाशार दर्या
आणि सूर्य अस्तास जातो जिथे !
कळ्यापाकळ्यांच्या तुझ्या पावलांची,
पैंजणे स्पर्शण्या लाट धावे तिथे !
स्थिरावून गगनी, रवी तो पहातो,
तुझे मूर्त सौंदर्य भांबावून !
आणि पूर्व क्षितिजावरी मंद तारे,
निशेच्या रुपेरी महालातून
तुझ्या ओंजळीच्या जळातून दिसते
सुवर्णात न्हाले निळे अंबर
कुणाला पाहावे ? तुला कि त्याला ?
संदेह दाटे मणी क्षणभर !
अशा आठवांचे किती सांजपक्षी,
मनाच्या आकाशात झेपावती !
सदा संधीकाली तुझी याद येता,
कडा नेत्रीच्या रोज पाणावती !